Regulus regulus vs Regulus ignicapilla

El Regulus regulus e 'l Regulus ignicapilla (el nomm scientifich de quest ultim a voeul dì "cavej de foeugh") hinn duu speci del gener Regulus, de la famiglia Regulidae. Tutt i speci de quest gener chì hinn assee compagn; a l'è minga 'na robba coriosa, donca, se in del desnoeuvesim secol — ann an'mò zerb par la tassonomia, la zoologia e i scienz biologich in general — el Giuseff Banfi (1812-1877), in del sò vocabolari milanes-italian, l'ha daa ai noster speci i medemm nomm.

A la vos "riottin" del sò vocabolari, nun troeuvom, primm de tutt, la speci che lù el ciama Sylivia troglodytes, e che incoeu la se ciama Troglodytes troglodytes (conossuu in italian 'me scricciolo), e depoeu anca:

[Riottin] de la coronna, Fiorrancino, Arancino, Fiorrancio, Regolo col ciuffo, Regolo (Regulus vulgaris) [R. regulus d'incoeu]: uccello silvano; parti superiori olivastre; gote grigie, unicolori. Anche diciamo Œucc de bò, Stellin, Meneghin, Ribin — Fiorrancino (Regulus ignicapillus) [sic]: uccello silvano; parti superiori olivaceo-giallastre; gote bianche striate (rigàa) di nero.

(G. Banfi, 1870, p. 587)

A partì de questa vos, poeudem intuì do robb, azni trè: 1) allora l'era on fatt conossuu che 'l R. regulus e 'l R. ignicapilla hinn speci divers; 2) a dispett de quest, a par che i font del Banfi an'mò je spartiven no, forsa perchè la distinzion l'era 'na robba noeuva e minga propalada a livel popolar; 3) depoeu de l'umil pivion e del Giò e de la Giulia, la cobbia del falcon che la fà el nin in sul Pirellon, el meneghin, con la crapa tensguda e 'l moeuves frenetich, el podaria vess nominaa 'me 'l terz usell simbol del caploeugh lombard!

Ma donca, 'se gh'è de different tra i duu? I rispost hinn principalment trè: differenz molfologich, de distribuzion, e de habitat.

Compagn, ma minga instess

La primma differenza, quella la pussee facil de notà, ma anca la men interessant, la sta in del piumasg: desgià el Banfi el notava che 'l R. ignicapilla el gh'aveva on color pussee vers el giald; la differenza pussee caratteristica, però, l'è in di bind di piumm in sul coo, che par el R. regulus hinn do, negra e gialda/oransg; in del R. ignicapilla a se gionta 'na binda bianca a cornis di alter do. In general, R. ignicapilla el gh'ha di color pussee viv.

A livell de distribuzion, quella del R. regulus l'è pussee ampi, eurasiatich: la va de l'Atlantich a la Cina, la Corea e 'l Giappon; el R. ignicapilla l'è ona specie occidental: la se troeuva soratutt in Europa, ma la gh'ha di popolazion in Anatolia e in Africa settentrional.

A la fin, la differenza la pussee granda l'è in del habitat, idest i ambient che i duu animaj frequenten. El Regulus regulus l'è pussee ligaa ai bosch de alber coi foeuj a guggia (gugg-foeuj), 'me pesc, pin e ares (Pinus larix); a l'incontrari, el R. ignicapilla el sta de cà in bosch pussee vari e componuu de alber a foeuja larga (latifoeuj), 'me i bosch mediterrani de sugher (Quercus suber) e de luzzitt (Quercus ilex).

Ona proposta par vess ciar

A l'è segond questa differenza de preferenza de habitat che a proponi douu nomm par podè destingu i do speci. Con quell che sia el nomm usaa, a proponi de specificà di pesc par el R. regulus e di rògor par el R. ignicapilla. Hinn minga di nomm precis, ma la precision scientifich l'è minga e pont. Donca, el Regulus regulus el sarà ciamaa ribin di pesc, meneghin di pesc o riottin di pesc, ciment el R. ignicapilla el sarà ciamaa ribin di rògor, meneghin di rògor o riottin di rògor.

Riferiment

Giuseppe Banfi. Vocabolario milanese-italiano. 1870, ed. Gaetano Grigola, Milano.

Jelena Kralj, Jirí Flousek, Miljenko Huzak, Davor Ćiković, Zdravko Dolenec (2013). Factors affecting the goldcrest/firecrest abundance ratio in their area of sympatry. Annales Zoologici Fennici, vol. 50, no. 6, 2013, pp. 333–46.

LIPU - Fiorrancino (consultaa el 14/03/2026)

LIPU - Regolo (consultaa el 14/03/2026)