Regulus regulus vs Regulus ignicapilla

El Regulus regulus e 'l Regulus ignicapilla (el nomm scientifich de quest ultim a voeul dì "cavej de foeugh") hinn duu speci del gener Regulus, de la famiglia Regulidae. Tutt i speci de quest gener chì hinn assee compagn; a l'è minga 'na robba coriosa, donca, se in del desnoeuvesim secol — ann an'mò zerb par la tassonomia, la zoologia e i scienz biologich in general — el Giuseff Banfi (1812-1877), in del sò vocabolari milanes-italian, l'ha daa ai noster speci i medemm nomm.

A la vos "riottin" del sò vocabolari, nun troeuvom, primm de tutt, la speci che lù el ciama Sylivia troglodytes, e che incoeu la se ciama Troglodytes troglodytes (conossuu in italian 'me scricciolo), e depoeu anca:

[Riottin] de la coronna, Fiorrancino, Arancino, Fiorrancio, Regolo col ciuffo, Regolo (Regulus vulgaris) [R. regulus d'incoeu]: uccello silvano; parti superiori olivastre; gote grigie, unicolori. Anche diciamo Œucc de bò, Stellin, Meneghin, Ribin — Fiorrancino (Regulus ignicapillus) [sic]: uccello silvano; parti superiori olivaceo-giallastre; gote bianche striate (rigàa) di nero.

(G. Banfi, 1870, p. 587)

A partì de questa vos, poeudem intuì do robb, anzi trè: 1) allora l'era on fatt conossuu che 'l R. regulus e 'l R. ignicapilla hinn speci divers; 2) a dispett de quest, a par che i font del Banfi an'mò je spartiven no, forsa perchè la distinzion l'era 'na robba noeuva e minga propalada a livel popolar; 3) depoeu de l'umil pivion e del Giò e de la Giulia, la cobbia del falcon che la fà el nin in sul Pirellon, el meneghin, con la crapa tensguda e 'l moeuves frenetich, el podaria vess nominaa 'me 'l terz usell simbol del caploeugh lombard!

Ma donca, 'se gh'è de different tra i duu? I rispost hinn principalment trè: differenz morfologich, de distribuzion, e de habitat.

Compagn, ma minga l'instess

La primma differenza, quella la pussee facil de notà, ma anca la men interessant, la sta in del piumasg: desgià el Banfi el notava che 'l R. ignicapilla el gh'aveva on color pussee vers el giald; la differenza pussee caratteristica, però, l'è in di bind di piumm in sul coo, che par el R. regulus hinn do, negra e gialda/oransg; in del R. ignicapilla a se gionta 'na binda bianca a cornis di alter do. In general, R. ignicapilla el gh'ha di color pussee viv.

A livell de distribuzion, quella del R. regulus l'è pussee ampi, eurasiatich: la va de l'Atlantich a la Cina, la Corea e 'l Giappon; el R. ignicapilla l'è ona specie occidental: la se troeuva soratutt in Europa, ma la gh'ha di popolazion in Anatolia e in Africa settentrional.

A la fin, la differenza la pussee granda l'è in del habitat, idest i ambient che i duu animaj frequenten. El Regulus regulus l'è pussee ligaa ai bosch de alber coi foeuj a guggia (gugg-foeuj), 'me pesc, pin e ares (Larix decidua); a l'incontrari, el R. ignicapilla el sta de cà in bosch pussee vari e componuu de alber a foeuja larga (latifoeuj), 'me i bosch mediterrani de sugher (Quercus suber) e de luzzitt (Quercus ilex).

Ona proposta par vess ciar

A l'è segond questa differenza de preferenza de habitat che a proponi douu nomm par podè destingu i do speci. Con quell che sia el nomm usaa, a proponi de specificà di pesc par el R. regulus e di rogor par el R. ignicapilla. Hinn minga di nomm precis, ma la precision scientifich l'è minga el pont. Donca, el Regulus regulus el sarà ciamaa ribin di pesc, meneghin di pesc o riottin di pesc, ciment el R. ignicapilla el sarà ciamaa ribin di rogor, meneghin di rogor o riottin di rogor.


Riferiment

Giuseppe Banfi. Vocabolario milanese-italiano. 1870, ed. Gaetano Grigola, Milano.

Jelena Kralj, Jirí Flousek, Miljenko Huzak, Davor Ćiković, Zdravko Dolenec (2013). Factors affecting the goldcrest/firecrest abundance ratio in their area of sympatry. Annales Zoologici Fennici, vol. 50, no. 6, 2013, pp. 333–46.

LIPU - Fiorrancino (consultaa el 14/03/2026)

LIPU - Regolo (consultaa el 14/03/2026)


Commenti

Posta un commento

Post popolari in questo blog

'Se l'è 'sta Popillia japonica?

Immagine
De recent, gh'è staa tant parlà, soratutt in Lombardia e in Piemont, d'on insettin verd e naranz sbarlusent, che d'on quaj ann el se ved in grand quantità in campagna, in di parch e  anca in sui piant de poggioeu. A se tratta de la Popillia japonica , on coleotter che 'l ven del Giappon , ben comun in Nordamerica, e che in di ultim ann l'è dree a spantegass in Europa a partì de l'Italia settentrionala.  La primma osservazion registrada in Italia l'è del 2014, propri in del Parch del Tesin, tra la Lombardia e 'l Piemont; incoeu, la garzella giapponesa (it. scarabeo giapponese) la s'è slargada foeura in alter region del Nord 'me in Svizzera (su iNaturalist , 'na piattaforma de scienza popolara, gh'hinn di identificazion anca in Slovenia, Sardegna, Pantelleria e Malta; a se tratta, però, ancamò de occorenz isolaa). Tecnicament, la specie la gh'era desgià rivada in Europa in di ann '70, quand che l'era sbarcada in di Azzore. Se a ...
Leggi »

El tass

Immagine
El tass europee, anca dii tass eurasiatich, l'è on animal che, nonostant ona distribuzion e 'na presenza assee ampia, l'è minga tant ben conossuu del pubblich general; tanta gent, in particolar in de la binda lombarda di Prealp, la s'immagina minga d'havegh 'na tanna de tass tacada a cà, ancaben che l'ecologia del tass in di ambient prealpin la sia ligada in moeud strecc ai attività de l'omm. Cossa l'è e indova el sta? El tass l'è 'na specie tipica de la fauna europea. El sò nomm scentifich l’è Meles meles e l’è on mammifer de la fameja di mustelid, che la ciapa dent animai ‘me ‘l foin ( Martes foina ), el marter ( Martes martes ) e la bélora ( Mustela nivalis ). El tass l’è long circa 60-80 cm, pussee ona coa de 15-20 cm; ai spall el riva circa 30 cm. El pes el girivolta cont i seson: el va de 8 a 16 kg. Donca, on animal minga piscinin, che par via di sò abitudin, el se fa notà assee poch. La soa caratteristica che la se fa pussee vardà ad...
Leggi »