'Se l'è 'sta Popillia japonica?

De recent, gh'è staa tant parlà, soratutt in Lombardia e in Piemont, d'on insettin verd e naranz sbarlusent, che d'on quaj ann el se ved in grand quantità in campagna, in di parch e anca in sui piant de poggioeu. A se tratta de la Popillia japonica, on coleotter che 'l ven del Giappon, ben comun in Nordamerica, e che in di ultim ann l'è dree a spantegass in Europa a partì de l'Italia settentrionala. La primma osservazion registrada in Italia l'è del 2014, propri in del Parch del Tesin, tra la Lombardia e 'l Piemont; incoeu, la garzella giapponesa (it. scarabeo giapponese) la s'è slargada foeura in alter region del Nord 'me in Svizzera (su iNaturalist, 'na piattaforma de scienza popolara, gh'hinn di identificazion anca in Slovenia, Sardegna, Pantelleria e Malta; a se tratta, però, ancamò de occorenz isolaa). Tecnicament, la specie la gh'era desgià rivada in Europa in di ann '70, quand che l'era sbarcada in di Azzore.

Se a se varda la morfologia, i adult de P. japonica gh'hann forma ovala (8-11 mm de longhezza; 5-7 mm de larghezza) e la femmina de solit l'è pussee granda del mas'c. La presenza de ciuff de pel bianch in sul fond de l'addomen l'è on caratter important che 'l permett de spartìla de alter coleotter compagn che se troeuven in di istess habitat, 'me la Anomala vitis (in lombard: caruga o carugola), la Cetonia aurata e soratutt la Phyllopertha horticola (el capon di ort).

In sens orari, d'in scima a manca: Anomala vitis;
Cetonia aurata; Phyllopertha horticola; Popillia japonica.
© Dan Mar © Izabella Farr © Kim Falck © Ingrid Kaatz

L'adult el campa per circa on mes tra giugn e agost e 'l se poeu trovà in rosc sossenn grand, desgià che l'è on animal gregari; el se nutriss e 'l se cobbia svelt. La femmina la fa i sò oeuv in del terren in pussee occasion; la preferiss el terren umed e assee ricch de materia organega. In dò settimann i oeuv i se derven e de quei en nassen di larv che stann in del terren fin a l'ann apos, adree a mangià radis soratutt de graminàs.

La Popillia la tacca on gran numer de speci vegetai: arbor de frut, speci de bosch, coltiv de camp e de ort, e piant ornamentai. I adult se mangen fior, frut e foeui; i larv, 'me desgià dii, attachen i radis, e donca i poeuden fà dann anca a praa, camp de sport e tappee erbos. In particolar, i dann ai foeui di scires e di vit, sia de uga sia americana, hinn assee important. Per fagh front a 'sto insett chì e mett in fren ai sò dann a gh'hinn divers metod: se poeuden drovà di agent di controll biologegh, idest liberà di nematod e di fonsg che tachen la P. japonica; gh'hinn de poeu anca duu tipi de trappol: i trappol de cattura, faa su de vasett ch'i tiren e ciapen sossenn adult; e i trappol quattaa d'ona red spruzzada con un insetticida.

Drovà di trappol l'è sossenn sconsigliaa in di ort privaa o in di giardin, desgià che la lor attrattiva la supera de gran longa la lor capacità de cattura; de conseguenza, la vegetazion ch'a se voeur protegg la subiss di dann an'mò pussee grand e gh'è el ris'c de diffond la specie.